الساعة ستة الصبح ( نثرية )

[سامي عبدالرحمن]

الساعة ستة الصبح



لما الواحد يمشي في شوارع و حواري القاهرة و يشوف الحياة البسيطة المعقدة الي هناك
يستغرب اذاي الناس كونت فيما بينها شخصية واحدة و ليها صفات و خصوصيات
مع ان غالبية سكان القاهرة مش من القاهرة منهم الصعيدي و البحراوي و الفلاحين و الي من اسكندرية و بورسعيد و كل محافظات مصر .
احس ان الناس دي راجل طيب ( الناس جمع و راجل مفرد )
الراجل الطيب دا واضح جدا في التصرفات في الكلام في السلام في الشغل
كل يوم الصبح انت و ماشي و الدكاكين و المحلات الكبيرة عمالك تتفتح على اليمين و الشمال الساعة ستة الصبح و صوت القرآن الكريم بصوت الطبلاوي او عبد الباسط بيصبح عليك
"صباحك فل يا حج محمد ربنا يكرمك "
كلو طالع للشغل .. كلو رامي حمولو على الله
الابتسامة و القفشة و المداعبة من كل الي ماشي و الي بيقول يا مسهل
بتاع العربية الكرو الي يمكن معدي من الشارع لاول مره بييصبح على كل الي في طريقو و يهزر مع الكل و كأنهم متربيين مع بعض و هم بيردو عليه بنفس الروح
بتاع العصير بيرش ميه و صوت الطبلاوي سورة الواقعة بيقولك ان اليوم هيكون مبارك و سعيد
الأطفال الي طالعة على المدارس بالبدل البني , راجل راكب بسكلتة بعد ممشي مسافة وقف و رجع عشان لقي بنت صغيرة رجلها تعبانة خدها وراه على البسكلتة عشان يوصلها للمدرسة
عم غريب جايب الفطار لأولادو العيش و الطعمية و الفول .. ريحة الطعمية السخنة تخليك عايز تصاحب عم غريب عشان يديك منها ..هو دا الصبح
راجل راكب عربية ملاكي غالية ماشي قدامو راجل بيتكلم مع صاحبو
( أوعى من الطريق يابن ال.......) ( نهارك ابيض ياحج.. و طريقك اخضر) (ياعم الراجل دا لسانو طويل مش سامع بيشتمك ازاي و انت بتقولو نهارك ابيض ) ( ههههههه يا عم هي هتلذق كبر دماغك )

[أحمد الدراجي]

جميل أن تؤرشف يوميات الأزقة والحواري
التي تمتد بامتداد الايام

جميل انت ايها السامي
تقديري ومحبتي

[إيمان المصرى]

والله صح كلامك يا عم سامى

يا سلام والواحد ماشى الصبح على شغله وهو فايت على بتاع العصير ويشربله كوباية عصير قصب من غير تلج يا سلام

وبعد كده يقابل بتاع الفول ويخدله شقتين فول بسلطة ومشطشطين

وطول ما أنت ماشى تصبح على ده وده كأنك عارفهم كلهم وهم نفس الكلام

ده كله طبعاً فى أحيائنا الشعبيه

معلش على الثرثرة اللى ممكن تكون ملهاش لازمة لكن كلامك هو اللى خلانى أرغى كده

وشكراً على الصورة اللى نقلتهلنا دى

وننتظر المزيد

[ديزيريه سمعان]

يوميــات مدينـــة

رسمها قلمــك ايها المبدع

استمتعــت بمتابعــة تلك الطقــوس يا سامي

[هايدي]

حواديتك دي حاجة مسلية و ممتعة

عشانها من الحقيقة

تخلي الواحد نفسه مش بس يسمع

نفسه يعيش الحياة دي بالبساطة دي و القلوب النقية الطيبة

بحب الحواديت اللي بتحكيها و بحس بجوها و ريحتها حتى اللي حكيتها في اللحظات الشعرية


أحكيلنا كمان يا عم و احنا سامعين


تقديري


هــايدي